7. desember 2025 er det fem år sidan opninga av Volda campus Sparebank1 arena. Fleire hundrede er innom der dagleg for kroppsøving og trening innan handball, volleyball og mange andre idrettar. I tillegg har der vore landskampar, konsertar, Grand Prix og ei rekke andre arrangement. Korleis starta det heile?
Kan det byggast ein ny idrettshall her? Det er i oktober 2015, og eg ser utover «Joplassen», den store tomta nedanfor Berte-Kanutte. Spørsmålet om korleis Volda skulle få bygd ein ny og større idrettshall hadde allereie i fleire år vore på ei endelaus ørkenvandring. Voldahallen trengte omfattande renovering, og hadde for liten kapasitet med omsyn til treningstider og publikum. I tillegg var gymsalane som ungdomsskulen og Øyra skule brukte nedslitt, og det stod heller ikkje så sprekt til med det Idrettsbygget kunne tilby for studentane. Løysinga for alle desse kunne vere å bygge ein ny idrettshall på Joplassen, i gåavstand til alle skulane og stor nok til at hallidrettane skulle få oppfylt sine behov. Brevet som eg sendte til kommunen der eg ba den om å sjå nærare på Joplassen som ein muleg løysing blei høfleg motteke, men utan at det då skjedde noko særleg meir.
I eit forsøk på å finne ei løysing på hallspørsmålet blei det hausten 2015 etablert ei kommunal hallgruppe der idretten var representert ved Olav Fure (Volda Idrettsråd) Erlend Krumsvik (KFUM Volda) og Johnny Kragset (Volda Handball). Etter prosess i hallgruppa iløpet av vinteren 2015/16 var den politiske og administrative leiinga i kommunen einige om at det mest realistiske ville vere å få bygd berre ein mindre enkel hall saman med fylkeskommunen på Steinrøysa ved den vidaregåande skulen.
På årsmøtet i Volda handball tidleg på vårparten i 2016 blei hallspørsmålet diskutert. På årsmøtet kunne Johnny rapportere om at den kommunale prosessen stod i stampe, og at det var problem med omsyn til både finansiering og plassering av ein ny idrettshall. Det mest aktuelle alternativet var ein liten hall på Steinrøysa eller ei moderat renovering av Voldahallen, men då ville ein framleis ha kun ei handballflate. I tillegg ville gåavstanden vere for lang for barne- og ungdomskulen, som dermed fortsatt ville vere utan kroppsøvingslokale ved ei slik «løysing». Det heile såg mørkt ut, kunne årsmøtet konkludere.
Vi begynte derfor å sjå på på tomter som allereie var eigd av det offentlege og regulert til skuleformål. Kunne det kanskje vere muleg å bygge i området mellom Øyra skule og Berte Kanutte-bygget? Det kunne vere ei plassering som kunne vere i praktisk avstand for alle elevar. Vi fekk ein arkitekt til å vurdere dette alternativet. Han konkluderte med at tomta hadde ei god og sentral plassering, men det ville bli både trongt og vanskeleg å bygge. Vi måtte derfor finne eit anna alternativ.
Johnny kom då tilbake og fortalde at han hadde ein plan. Gjennom sitt yrke hadde han tidlegare hatt samtalar med Eiliv Halkjelsvik i samband med mogleg sal av den sentralt beliggande tomta på Joplassen. Var moglegheitene for ein ny idrettshall her? Johnny gjenopptok kontakten med tomteeigar, og Eiliv og familien stilte seg umiddelbart positiv til ideen og planane.
Samstundes starta Johnny og Anita Kragset ein prosess for å få bygd ein best mogleg idrettshall i idrettens regi. Anita utarbeida eit omfattande romprogram for å synleggjere moglegheitane. Dette blei presentert både for den kommunale hallgruppa, kommunestyret, Volda handballklubb og KFUM Volda i mai 2016. Det var på dette tidspunktet ikkje offentleg kunngjort at tomta på Joplassen kunne vere aktuell.
Sommaren 2016 fekk Johnny og Anita Kragset engasjert det lokale selskapet Fire Grader AS til å utarbeide ein 3d illustrasjon av den mogleg nye idrettshallen. Illustrasjonen sa meir enn tusen ord, og synte at plasseringa av hallen var optimal.
Utover sommaren blei det ført konstruktive samtalar med tomteeigar som gav oss trua på at det ville vere muleg å få i hamn ein avtale, men optimismen skulle snart bli dempa. I slutten av juli 2016 kunne ein nemleg lese i Møre at det var fleire som var interessert i den same tomta. Høgskulen planla å bygge eit nytt mediebygg, og såg føre seg at det ville bli nødvendig å sikre seg denne tomta til parkeringsareal. Høgskulen ba derfor om at Volda kommune skulle kjøpe denne tomta, om nødvendig med bruk av ekspropriasjon, for å legge til rette for høgskulen sine byggeplanar.
Skulle det endå ein gong ikkje lykkast å byggje ein ny idrettshall? Det blei satt fortgang i forhandlingane med eigar av tomta, og i september var ein langt på veg einige om både pris og vilkår. Då var tida inne for å involvere styret i Volda handball for å fortelje kva som var på gang.Med bakgrunn i Volda Handball sine ambisjonar og KFUM Volda sine tradisjonar var strategien for å lykkast at ein skulle få klubbane til å skipe selskapet Volda campus arena AS (VCA) der formålet skulle vere å realisere ideen og planen om ny idrettshall på Joplassen. Styret ved skipinga var Arild Bakke (leiar i Volda HK), Rune Aarflot (leiar i KFUM Volda), Idar Flo, Erlend Krumsvik og Johnny Kragset.
Tidleg i oktober blei kjøpsavtalen om tomta signert, og det låg an til finansiering av tomtekjøpet gjennom avtale med Sparebank 1 Søre Sunnmøre der Hallvard Bjørneset og Vidar Egset hadde vore kjent med planane ei tid og syntest det var ein god plan. No gjenstod det å presentere prosjektet på rette måten for resten av Volda, og den 21. oktober la styret i VCA fram planane på ein pressekonferanse saman med Sparebank 1 Søre Sunnmøre.
Sjøl om VCA no hadde sikra seg tomta var ein langt ifrå mål. Det var mange som måtte overtydast om at dette var liv laga, og fyrste stopp for VCA var eit møte med kommunen 1. november. I begynnelsen av møtet gav ordføraren tydelege signal om at høgskulen sine ønske om tomta måtte ha forrang. Men etter kvart som vi fekk lagt fram VCA sitt syn på saka så snudde stemninga. Møtet endte med at kommunen var positive til at idretten sjølv hadde teke initiativ til å bygge ny idrettshall, og ville vise velvilje for å få dette til.
For å overtyde opinionen inviterte VCA nokre veker seinare inn til folkemøte. Der hadde vi fått Rolf Navarsete frå Sogndal IL til å presentere kva realisering av idrettsanlegg hadde hatt for positive ringverknader for Sogndal. Sjølv om mange var svært positive til VCA sine planar, var det framleis mange hinder som måtte passerast. Det viktigaste var å få inn skulane som leigetakarar slik at finansieringa kunne sikrast. I tillegg måtte reguleringsplan for området utarbeidast og sjølve idrettshallen planleggast. Området skulle regulerast for idrettshall og symjehall (Voldabadet) med felles infrastruktur. I dette arbeidet stilte Ottar Skare aktivt opp med sin gode kompetanse, engasjement og bidrog med til ein veldig god og heilheitleg plan.
I november 2017 fekk ein delegasjon frå VCA omvisning i Hønefoss arena. Fv. : Idar Flo, Arild Bakke, Anita Kragset og Johnny Kragset
I løpet av det neste året reiste representantar frå VCA på synfaring til nye idrettshallar for å samle erfaring. Etter at vi var fyrst hadde vore innom Utleira og Hønefoss gjekk turen til slutt til Nadderud arena i Bærum. Det blei på fleire måtar eit lykketreff.
Nadderud arena falt straks i smak, og skulle etter kvart bli «modell» for vår idrettshall. I tillegg fekk vi der møte sivilingeniør Knut Guldbrandsen som hadde leia prosjektet med å bygge Nadderud arena, og arkitekt Stefan Ekberg som hadde stått for teikninga. Vi konkluderte nokså fort at dette var nyttig erfaring og kompetanse som vi kunne ha stor nytte av. Få dagar etter turen til Bærum fekk VCA derfor engasjert desse to ressurspersonane i utviklinga og gjennomføringa av vårt prosjekt.
Styreleiar i VCA as Arild Bakke la ned eit betydeleg arbeid, og var ei avgjerande drivkraft for realiseringa av Volda campus Sparebank1 arena. Gjennom mange år som leiar for Volda handball hadde Arild kjempa for betre forhold for hallidrettane, og ved opninga i 2020 kunne han feire med kake at draumen var oppfylt.
Parallelt med prosjekteringa av idrettshallen heldt arbeidet med finansiering fram. Nærleiken til Øyra skule og ungdomsskulen bidro til at kommunen kunne gå inn som leigetakar. Det sat noko lenger inne å få eit endeleg ja frå fylkeskommunen, sjølv om reknestykket viste at dette ville vere den billegaste løysinga. Fylket måtte i denne tida også finne pengar til å bygge Nordøyvegen, og dette skapte vanskar. Til slutt falt likevel også denne brikka på plass, og VCA fekk istand ein leigeavtale med fylket.
Arkitekt Stefan Ekberg presenterte i denne 3D-modellen i august 2018, ikkje så ulikt det ferdige resultatet.
På mange måtar var dei vanskelegaste hindera no passert, men enno var det mykje som gjensto. Framleis var det ei lang rekke med møter og e-postar som måtte til før vi endeleg var klare til å setje i gang med bygginga i august 2019. Det var Betonmast Røsand AS som vann anbodet, og sjøl om mykje av arbeidet måtte gjerast under den verste koronoperioden så blei bygginga berre eit par veker forseinka. Den 7. desember 2020 blei Volda Campus sparebank1 arena offisielt opna, og det fyrste arrangementet var handballkampen mellom Volda og Gjerpen den 10. desember. Sidan har det blitt eit samlingspunkt der tusenvis har vore innom for trening, kampar, undervisning, konsertar og mykje anna. Kva ville Volda ha vore utan Volda Campus sparebank1 arena?
Idar Flo
Styremedlem VCA AS
